“நான்” தோற்க வேண்டும்

பூக்கப்போகும் புதிய ரோஜாக்களுக்காக
உயிர்களைப் பதியம் போட
உடன்பாடில்லை எனக்கு

கனத்த உறுப்புக்களைக்
கழற்றி எறிந்து விட்டு
இலேசான இதயத்தோடு வா
பேச்சுவார்த்தை நடத்தலாம்!

படத்துக்காகவும்
தொலைக்காட்சிக்காகவும் இல்லாமல்
உனக்காகவும் எனக்காகவும் நம்மவர்களுக்காகவும்
புன்சிரித்து கைகளைக் குலுக்கிக் கொள்ளலாம் வா

வென்றது போதும்
தோற்க வேண்டும் “நான்”
உன் அம்புகளுக்காக
என் நெஞ்சு
சட்டையைக் கழற்றிவிட்டு
நிர்வாணமாக நின்று கொண்டிருக்கிறது!
குறி பார்த்து எறி
அம்புகளையும் அன்புகளையும்!